Мемлекеттік гимні

Әнұран – мемлекеттің негізгі рәміздерінің бірі. «Әнұран» термині грек тіліндегі «gimneo» сөзінен шыққан және «салтанатты ән» дегенді білдіреді. Әнұран – ел азаматтарының әлеуметтік-саяси топтасуы мен этномәдени бірегейлігі үшін маңызды дыбыстық рәміз болып табылады. Тәуелсіз Қазақстанның тарихында мемлекеттік әнұран екі рет бекітілді – 1992 және 2006 жылдары. 1992 жылы республика мемлекеттік егемендікке қол жеткізгеннен кейін Қазақстанның әнұранына музыка мен мәтін бойынша байқау жарияланды. Байқау қорытындысы бойынша Қазақ КСР-інің әнұранының музыкалық редакциясын сақтау туралы шешім қабылданды. Осылайша, алғашқы қазақстандық әнұранның музыка авторлары Мұқан Төлебаев, Евгений Брусиловский және Латиф Хамиди болды. Ең үздік мәтін байқауында белгілі ақындар Мұзафар Әлімбаев, Қадыр Мырзалиев, Тұманбай Молдағалиев және ақын Жадыра Дәрібаева ұсынылған авторлар ұжымы жеңіске жетті. 2006 жылы елдің дыбыстық рәміздерін насихаттау мақсатында жаңа мемлекеттік әнұран қабылданды. Оның негізіне халық арасында танымал «Менің Қазақстаным» патриоттық әні алынды. Ән 1956 жылы Шәмші Қалдаяқовтың музыкасына Жұмекен Нәжімеденовтың өлеңдері жазылған. Әнге мемлекеттік әнұранның мәртебесін беру және оны салтанатты етіп шығару үшін Қазақстан Республикасының Президенті Нұрсұлтан Назарбаев бастапқы мәтінді толықтырды. 2006 жылдың 6 қаңтарында Қазақстан Парламенті палаталарының бірлескен отырысында «Мемлекеттік рәміздер туралы» Жарлыққа тиісті түзетулер енгізіліп, елдің жаңа мемлекеттік әнұраны бекітілді. Сөз авторлары: Жұмекен Нәжімеденов, Нұрсұлтан Назарбаев Музыка авторы: Шәмші Қалдаяқов Алтын күн аспаны, Алтын дән даласы, Ерліктің дастаны, Еліме қарашы! Ежелден ер деген, Даңқымыз шықты ғой. Намысын бермеген, Қазағым мықты ғой! Қайырмасы: Менің елім, менің елім, Гүлің болып егілемін, Жырың болып төгілемін, елім! Туған жерім менің – Қазақстаным! Ұрпаққа жол ашқан, Кең байтақ жерім бар. Бірлігі жарасқан, Тәуелсіз елім бар. Қарсы алған уақытты, Мәңгілік досындай. Біздің ел бақытты, Біздің ел осындай! Қайырмасы: Менің елім, менің елім, Гүлің болып егілемін, Жырың болып төгілемін, елім! Туған жерім менің – Қазақстаным!