Мемлекеттік ту – мемлекеттің негізгі рәміздерінің бірі, ол елдің егемендігі мен бірегейлігін білдіреді. «Ту» термині голланд тіліндегі «vlag» сөзінен шыққан. Ту – бекітілген өлшемдер мен түстерге сәйкес, әдетте, елтаңба немесе эмблема бейнеленген ағашқа немесе жіпке байланған мата. Ежелгі заманнан бері ту халықты біртұтас етіп, мемлекеттің белгілі бір құрылымымен сәйкестендіру қызметін атқарған.

Тәуелсіз Қазақстанның мемлекеттік туы 1992 жылы ресми түрде қабылданды. Оның авторы суретші Шәкен Ниязбеков.

Қазақстан Республикасының мемлекеттік туы көгілдір түсті тікбұрышты мата, оның ортасында күннің бейнесі және оның астында қалықтап ұшқан қыран (бүркіт) бейнеленген. Тудың ағаш жағында ұлттық өрнекпен безендірілген тік жолақ бар. Күннің, оның сәулелерінің, қыранның және ұлттық өрнектің бейнесі алтын түспен бейнеленген. Тудың ені мен ұзындығының арақатынасы – 1:2.

Геральдика дәстүрінде әрбір түс белгілі бір ұғымды білдіреді. Көгілдір түс адалдықты, сенімділікті және мінсіздікті білдіреді. Сонымен қатар көгілдір түстің түркі мәдениетінде терең символдық мәні бар. Ежелгі түріктер аспанды әке-құдайы деп санаған, ал олардың көгілдір туы ата-бабасына адалдықты білдірген. Қазақстанның мемлекеттік туындағы көгілдір түс ашық аспанды, бейбітшілік пен амандықты білдіреді, ал біртекті фон – еліміздің бірлігін бейнелейді.

Геральдика қағидаларына сәйкес, күн байлық пен молшылықты, өмір мен энергияны білдіреді. Сондықтан тудың күн сәулелері астық пішінінде бейнеленген – молшылық пен амандықтың символы. Қазақстанның мемлекеттік рәміздеріндегі күн бейнесі оның жалпыадамзаттық құндылықтарға беріктігін растайды және жаңа жас мемлекеттің өмірге деген құштарлығын және әлемнің барлық елдерімен серіктестік пен ынтымақтастыққа ашықтығын білдіреді.

Қыран (бүркіт) бейнесі – көптеген халықтардың елтаңбалары мен туларына қолданылып келе жатқан негізгі геральдикалық рәміздердің бірі. Бұл бейне әдетте биліктің, көрегендіктің және жомарттықтың символы ретінде қабылданады. Күн астында қалықтап ұшқан қыран мемлекеттің күшін, оның егемендігі мен тәуелсіздігін, жоғары мақсаттарға және тұрақты болашаққа ұмтылысын білдіреді. Бүркіт бейнесі Еуразия көшпенділерінің дүниетанымында ерекше орын алады. Ол еркіндік пен адалдық, абырой мен батылдық, күш пен адалдық ұғымдарымен байланыстырылады. Алтын бүркіттің стильденген силуэті жас тәуелсіз мемлекеттің әлемдік өркениеттің биіктеріне ұмтылысын бейнелейді.

Мемлекеттік тудың маңызды элементтерінің бірі – ағаш жағындағы ұлттық өрнекпен безендірілген тік жолақ. Қазақтың ұлттық өрнегі – халықтың эстетикалық талғамына сәйкес әлемді қабылдаудың ерекше көркемдік формаларының бірі. Әртүрлі формалар мен сызықтардың үйлесімін білдіретін ол халықтың ішкі дүниесін ашудың мәнерлі құралы болып табылады. Ағаш жағындағы ұлттық өрнек Қазақстан халқының мәдениеті мен дәстүрлерін білдіреді.